Lesson 2:- Tense |LEARN ENGLISH
काळ व त्यांचे उपयोग
नका तुम्ही ऐकलं असेल की काळ तीन प्रकारचे असतात. पण काळ तीन प्रकारचे असतात ही माहिती ऐकूनच मिळते असं नाही. कोणालाही कळतं काळाचे प्रकार तीनच असणार. आणि तीनच प्रकार का तेही जास्त स्पष्ट करून सांगण्याची गरज नाही – कारण आहेतच तीन तर चौथा प्रकार येणार कुठून? आहे की नाही?
काळाचे तीन प्रकार खालीलप्रमाणे :-
१) Present Tense (वर्तमानकाळ)
२) Past Tense (भूतकाळ)
३) Future Tense (भविष्यकाळ)
काळ ओळखता येतो का?
– चालू काळ
– पूर्ण काळ
हे शब्द तुम्ही ऐकलेलेच आहेत. पण सध्या फक्त वर्तमानकाळ, भूतकाळ किंवा भविष्यकाळ इतकंच तुम्ही सांगायचं.
वाक्ये पहा :-
१) मी इंग्रजी शिकवतो.
२) मी इंग्रजी शिकवत आहे.
तुम्हाला या वाक्यांचा काळ ओळखायला उशीर लागला नाही – दोन्ही वाक्ये वर्तमानकाळाची आहेत. पण लक्षात इथे हे घ्यायचंय की दोन्ही वाक्यांतील क्रिया मात्र सारखीनाही, जसं दुसऱ्या क्रमांकाच्या वाक्यात क्रिया चालू आहे पण पहिल्या वाक्यात क्रिया दिसत नाही.
यावरून असं कळतं की एका काळात एकाच प्रकारची क्रिया असते असं नाही, एकाच काळात वेगवेगळ्या प्रकारच्या क्रिया असू शकतात – आणि असतात. म्हणून या तीन मुख्य काळांचे उपप्रकार पडले आहेत.
प्रत्येक काळाचे चार उपप्रकार आहेत.
१) Simple Tense (साधा काळ)
२) Continuous Tense (चालू काळ)
३) Perfect Tense (पूर्ण काळ)
४) Perfect Continuous Tense (पूर्ण चालू काळ)
प्रत्येक काळाचे चार उपप्रकार आहेत – वर्तमानकाळाचे चार, भूतकाळाचे चार, आणि भविष्यकाळाचे चार प्रकार असा झाला.
वर्तमानकाळाचे चार प्रकार म्हणजे –
१) साधा वर्तमानकाळ
२) चालू वर्तमानकाळ
३) पूर्ण वर्तमानकाळ
४) पूर्ण चालू वर्तमानकाळ.
भूतकाळाचे चार प्रकार म्हणजे
१) साधा भूतकाळ
२) चालू भूतकाळ
३) पूर्ण भूतकाळ
४) पूर्ण चालू भूतकाळ.
भविष्यकाळाचे चार प्रकार म्हणजे
१) साधा भविष्यकाळ
२) चालू भविष्यकाळ
३) पूर्ण भविष्यकाळ
४) पूर्ण चालू भविष्यकाळ.
बारा उपप्रकार पैकी तीन साधे काळ आहेत . (साधा वर्तमानकाळ, साधा भूतकाळ, साधा भविष्यकाळ). तीन चालू काळ आहेत, तीन पूर्ण काळ आहेत व बाकीचे तीन पूर्ण चालू काळ आहेत.
या बारा काळांचा अभ्यास आपण चार वर्तमानकाळ, चार भूतकाळ आणि चार भविष्यकाळ या क्रमाने करण्याऐवजी तीन साधे काळ, तीन चालू काळ, तीन पूर्ण काळ आणि तीन पूर्ण चालू काळ या क्रमाने करणार आहोत. हा क्रम काळांचा उपयोग समजण्यासाठी जास्त योग्य राहील.
साध्या वर्तमानकाळाची वाक्ये तुम्हाला बोलताना लागणार आहेत. म्हणून या काळाची वाक्ये कशी असतात, त्यांना इंग्रजीत बोलायचं कसं ते आपण आता पहायचं आहे. पहिल्यांदा आपण या काळाचा उपयोग लक्षात घेऊ. उपयोग समजण्यासाठी साध्या वर्तमानकाळाची काही मराठीची वाक्ये पहा – वाक्यातील क्रिया कशा प्रकारची आहे तिकडे लक्ष द्या.
१) सूर्य पूर्वेस उगवतो.
२) हरी खोटे बोलतो.
३) रमेश अमेरिकेत राहतो.
४) तो सकाळी लवकर उठतो.
५) ते रोज १६ तास काम करतात.
६) कुत्रे भुंकतात.
वरीलपैकी कुठल्याही वाक्यात क्रिया चालू दिसत नाही. किंवा एखाद्या वेळेसच ही क्रिया होते असेही दिसत नाही. या नेहमीच्या क्रिया आहेत. सूर्याचं पूर्वेस उगवणं रोजचंच आहे. खोटे बोलणे हरीची सवयच आहे. आणि अमेरिकेत राहणं रमेशचं नेहमीचंच आहे. यावरून साध्या वर्तमानकाळाचा उपयोग आपल्या लक्षात येतो.
पहा:- एखादे नैसर्गिक सत्य, एखाद्याची वर्तमानकाळातील सवय किंवा नेहमी होणारी क्रिया व्यक्त करण्यासाठी साधा वर्तमानकाळ वापरतात. ‘साधा वर्तमानकाळ वापरतात’ म्हणजे काय?
लक्षपूर्वक वाचा :- ‘साधा वर्तमानकाळ वापरतात’ म्हणजे साध्या वर्तमानकाळाची जी ‘रचना’ पुढे येत आहे ती रचना वापरतात.
मराठीचं वाक्य इंग्रजीत अचूक करता येण्यासाठी मराठीच्या वाक्याचा काळ अचूक ओळखता येणं आवश्यक आहे. पण फक्त वर्तमानकाळ, भूतकाळ किंवा भविष्यकाळ इतकंच ओळखणं पुरेसं नाही. कारण आपल्याला कळलं की वर्तमानकाळ चार आहेत, भूतकाळ चार आहेत आणि भविष्यकाळही चार आहेत. आणि या बारा काळांच्या १२ वेगवेगळ्या रचना आहेत.
म्हणून वाक्याचा नेमका काळ कोणता ते ओळखावं लागेल. नेमका काळ समजल्यावर बरोबर रचना वापरून बरोबर वाक्य करता येईल. जसं, एखादं वाक्य वर्तमानकाळाचं आहे इतकंच आपल्याला कळलं तर रचना कोणती वापरणार वर्तमानकाळाच्या तर चार रचना आहेत. पण जर वाक्य चालू वर्तमानकाळाचं आहे असं समजलं तर नेमकी चालू वर्तमानकाळाची रचना वापरून वाक्य करता येईल.
हे वाचत असताना कोणासमोर जर असा प्रश्न पडला की ‘काळ’ ओळखून, रचना पाहून मी मराठीचं वाक्य इंग्रजीमधे करून बोलेपर्यंत समोरचा माणूस थांबेल का? तर हा वाजवी प्रश्न आहे. याचं उत्तर पुढे तुम्हाला सविस्तर मिळेलच. सध्या फक्त इतकं लक्षात घेणं पुरेसं आहे की हे सुरुवातीचे दिवस आहेत. म्हणूनच काळ ओळखून रचनेप्रमाणे लक्षपूर्वक वाक्य करावं